Usted está aquí: Inicio / Xente / Grupos / Os de Maderne

Os de Maderne

A historia deste conxunto coñecemola a través de Modesto Arias López “Modesto de Murias” (Murias dos Baos, Maderne, A Fonsagrada 1937).

Aquilino Fernández que facía de director e José Antonio eran os gaiteiros, Juan tocaba o bombo e os platillos e Manuel Gutiérrez entrara a tocar a caixa no sitio de Emilio, que morrera na guerra. Alí en Maderne tiñan gaitas de buxo feitas por Fermín de Grandas en Sib que requinteaban de marabilla”.

Despois, nos anos 50, Aquilino (que tamén tocaba o clarinete) xuntou a mozos da zona e formou unha banda con clarinetes, saxos, trompeta, tuba (“baixo” lle chamaban) e unha caixa e máis bombo con pedal de madeira que facía de batería. A banda durou poucos anos a causa da emigración de boa parte dos seus compoñentes pero, fundamentalmente, pola morte do seu director e alma do grupo Aquilino Fernández.

En 1958 Modesto xunto con Aladino Gutierrez (gaitas), José Rodriguez (clarinete) e Celedonio Mendez (“batería”) decidiron reorganizar o cuarteto de Maderne. Esta última formación estivo activa ata 1962-63 anos nos que a emigración voltou levar a dous dos seus compoñentes a Cangas de Narcea e Barcelona. Quedaron Aladino e Modesto, pero na comarca case non quedaba xente nova e deixáronse de facer as festas. Aquí rematou a historia do cuarteto de Maderne.

Modesto tocou algunha vez acompañado á caixa polo fillo de Aquilino (Avelino Fernández) en algunha festiña pero, ao final, el mesmo tamén marchou a Barcelona en 1973 e non voltou para Fonsagrada ata despois de xubilarse en 1997. En Barcelona foi socio fundador da Agupación Cultural Saudade (Escola de Gaitas e Danzas)